गौतमया निंतिं परराष्ट्रया लबिङ

राष्ट्रसंघीय महासभाया सभाध्यक्षया निंतिं उम्मेदवार जुयादीम्ह राष्ट्रसंघया पुलांम्ह महासचिव कुलचन्द्र गौतमया पक्षय् परराष्ट्रं लबिङ शुरु याःगु दु । शुक्रवाः निसें परराष्ट्रं गौतमया पक्षय् नेपाः स्थित एसियाली देय्या दूतावास व विदेश स्थित नेपाली नियोगय् पौ छ्वयाः नेपाःया उम्मेदवारीयात समर्थन यायेत इनाप याःगु दु । गौतमया पक्षय् लबिङ शुरु यायेत मन्त्रिपरिषद्या ज्याकूथीं बिहीवाः पौ छ्वयाः पररष्ट्रयात निर्देशन ब्यूगु खः ।

थुगुसी राष्ट्रसंघीय महसभाया अध्यक्षता यायेगु पाः एसियाली देय्या खः । उकीया निंतिं कतारं थःगु उम्मेदावरी बीधुंकूगु दुसाः लबिङ नं शुरु याये धुंकूगु दु । लबिङ स्वरुप कतारं थःगु उम्मेदवारयात समर्थन यायेत नेपाःयात वंगु बुधवाः पौ छ्वःगु दु ।