गृहमन्त्री प्रचण्ड निवासय्
गृहमन्त्री भीम रावल न्हू बजार स्थित एनेकपा (माओवादी)या अध्यक्ष पुष्पकमल दाहाल 'प्रचण्ड'या निवास थ्यंकाः माओवादी सेना समायोजन लगायत विषयया बारे सहलह यानादीगु दु ।
बिहीवाः सुथय् मन्त्री रावल व प्रचण्ड दथुइ वर्तमान राजनीतिक अवस्था, राजनीतिक गतिरोध लगायत सेना समयोजन व शान्ति प्रकृया बारे सहलह जूगु खः । खँल्हाबंला लिपा गृहमन्त्री रावलं राजनीतिक दलत दथुइ खनेदुगु असहमतिया गुकथं क्वचायेकेगु बारे सहलह जूगु कनादिल ।
माओवादी अध्यक्ष प्रचण्डं सेना समायोजनया बारे माओवादीं स्पष्ट खाका न्ह्यब्वयेधुंकूगु धयादिसें उकीयात बिना आधार कांग्रेस व एमालें अस्वीकार याःगु व सहमति यायेत पंग थनाच्वंगु गुनासो प्वंकादीगु खः ।
उगु इलय् गृहमन्त्री रावलं प्रधानमन्त्री माधवकुमार नेपालयात स्पष्ट बहुमत दुसाः राष्ट्रिय सहमतिय सरकार गठनया निंतिं राजीनामा ब्यूगु धयादिसें वय्कया राजीनामा लिपा नं सहमतिय सरकार गठन मजूगु बारे प्रचण्डया ध्यानाकषर्ण यानादीगु खः ।
अथेहे गृहमन्त्री रावलं चिनियाँ व्यापारीतय्त लुटे याःगु द्वपं लानाच्वंम्ह माओवादी केन्द्रीय दुजः काली बहादुर खामया विषयलय् नं खँल्हाबंला यानादीगु खँ सीदुगु दु । वय्कलं माओवादी अध्यक्ष प्रचण्डायात खामयात ज्वनेत ग्वाहालि यायेत इनाप यानादीगु खः ।
