आयोगया दुजः ल्ययेगु ज्या न्हूगु सरकार निर्माण जुइधुंकाः जक
राज्य पुनर्संरचना आयोगया दुजःत न्हूगु सरकार गठन जुइधुंकाः जक ल्ययइगु जूगु दु ।
बिहीवाः च्वंगु प्रमु स्वंगू दलया बैठकय् साउन १५ गते निसें ज्या याइगु कथं आयोगया संरचना निर्माण यायेत सहमति प्वंकूसें उकीया दुजःत धाःसा न्हूगु सरकार गठन लिपा जक ल्ययेगु सहमति जूगु दु । बैठक लिपा माओवादी उपाध्यक्ष नारायणकाजी श्रेष्ठ 'प्रकाशं' आयोगया दुजःत न्हूगु सरकार निर्माण जुइधुंकाः जक ल्ययइगु कनादिल ।
थ्वस्वयां न्ह्यः च्वंगु स्वंगू दलया बैठकं विज्ञत दुथ्याःगु न्हय्म्ह दुजः दुगु आयोग गठन यायेगु सहमति याःगु खः । उगु आयोगयात निलया दुने राज्य पुनर्संरचनाया बारे प्रतिवेदन सहित सुझाव बीगु कथं गठन यायेगु सहमति नं स्वंगू दलत दथुइ जुइधुंकूगु ख: ।
अथेहे थौंया बैठकय् स्वंगू दलं चैत मसान्त दुने संविधान निर्माण पूवंकेगु कथं कार्यतालिका दयेकेत नं सहमति प्वंकूगु दु । नापं संविधान निर्माणय् खनेदुगु असहमति संविनधानसभाय् दुथ्याःगु नीन्यागूलिं दल नाप सहलह यानाः साउन दुने अन्त्य यायेगु सहमति नं याःगु दु ।
