सद्भावनाया महासचिव पार्टी पाखें निष्काशित

नेपाल सद्भावना (आनन्दीदेवी) पार्टीया अध्यक्ष सरित गिरीं पार्टीया महासचिव यशवन्तकुमार सिंहयात महासचिव पद पाखें मुक्त यानादीगु दु । अध्यक्ष गिरीं बुधवाः छगू विज्ञप्ति पिथनादिसें पार्टीयात विवादय् हयाः भ्रम ब्वलंकेत स्वःगु व थःत कारवाही याःगु धकाः फर्जी विज्ञप्ति जारी याःगुलिं सिंहयात साधारण सदस्य समेतं निलम्बन याःगु खँ धयादीगु दु । विज्ञप्तिइ सिंहयात छानबिन समितिया निर्णय कथं थंज्याःगु कारवाही याःगु खँ धयातःगु दु ।

थ्वस्वयां न्ह्यः पार्टीया मानार्थ अध्यक्ष आनन्दीदेवीया नामं छगू विज्ञप्ति पिथंसें अध्यक्ष गिरीयात पार्टी पाखें निष्काशित याःगु विज्ञप्ति पिहांवःगु खःसा उकीया द्वपं सिंहयात ब्यूगु दु ।