माओवादीं नं प्रमया उम्मेदवारी बीगु
येँ (सन्ध्या टाइम्स)/सहमतिया आधारय् संयुक्त राष्ट्रिय सरकार दयेकेगु कुतः ताःमलायेवं बहुमतीय प्रणालीं सरकार दयेकेगु प्रक्रिया शुरु जुइधुंकूगु अवस्थाय् आः माओवादीं नं प्रधानमन्त्रीया लागिं उम्मेदवारी बीगु जूगु दु। माओवादीं छुन्हु निन्हुया दुने हे थःपिंपाखें प्रधानमन्त्रीया उम्मेदवारी सार्वजनिक याइ धाःगु दु ।
बहुमतीय प्रणालीया दथुइ नं सहमति यायेगु धकाः खँ जूसां कांग्रेस व एमाले लिपांगु इलय् वयाः बहुमतीय प्रणाली कथं पुलांगु हे गठबन्धनया आधारय् प्रधानमन्त्री ल्ययेगु तयारी याःगुलिं माओवादीं नं थःगु आन्तरिक तयारी याःगु खः धकाः माओवादीया छम्ह नेतां धयादीगु दु ।
माओवादीं संविधानसभाय् दुथ्याःगु चिचीधंगु राजनीतिक दल नापं थीथी ख्यःया मनूतलिसे सहलह ब्याकाः बहुमतीय प्रधानमन्त्रीया लागिं नं उम्मेदवार बीगु तयारी याइ धाःगु दु।
माओवादी लिपांगु इलय् तक नं संविधान निर्माणया नितिं दुई तिहाइ बहुमत माःगु जुयाः थःपिनिगु नेतृत्वय् दुई तिहाइ बहुमतया सरकार दयेकेगु नं कुतः यानाच्वनीगु खँ माओवादीया नेतां धयादीगु दु ।
छुं जुयाः दुई तिहाई बहुमतया सरकार नं दयेके मफुत, बहुमतया आधारय् पुलांगु संरचना कथं प्रधानमन्त्री जक हिलेगु ज्या जुल धाःसा संसद दुने माओवादी प्रमुख प्रतिपक्षय् च्वनी धकाः नं वय्कलं कनादीगु दु। तर माओवादी प्रतिपक्षय् च्वने माल धाःसा कडा रुपं थःपिंत प्रस्तुत याइगु खँ नं धाःगु दु ।
