आः कांग्रेसं नेतृत्व याइ: कोइराला
येँ (सन्ध्या टाइम्स)/नेपाली कांग्रेसया कार्यवाहक सभापति सुशिल कोइरालां आः बहुमतीय सरकारया नेतुत्व कांग्रेसं हे याइगु दावी यानादीगु दु ।
नेपाल प्रेस युनियन बाँकें थौं सुथय् याःगु छगू अन्तर्क्रिया ज्याझ्वलय् न्ववासें राष्ट्रिय सहमतीया सरकारया सम्भावना मदयेवं आः कांग्रेसया नेतृत्वय् सरकार गठन जुइगु दावी वय्कलं यानादीगु खः ।
वय्कलं धयादीगु दु, 'माओवादी व एमालेया नेतृत्वय् दयेकूगु सरकारं संविधान व शान्ति प्रक्रियायात तार्किक निष्कर्षय् थ्यंके मफुगुलिं आः जिम्मेवारी कांग्रेसया जूगु दु ।'
लिसें वय्कलं आः कांग्रेसया हे नेतृत्वय् सरकार गठन जुइगु दावी नं अन यानादिल। सहमतिया सरकार दयेके मफुगु धइगु माओवादीं यानाः हे खः धासें माओवादी सेना समायोजनया विपक्षय् दुगुलिं हे सेना समायोजन याये मफयाच्वंगु खः धकाः नं वय्कलं द्वपं बियादिल ।
थ्व हे दथुइ नेपाली कांग्रेसया केन्द्रीय कमिटीया बैठक थौं सनिलय् च्वनीगु जूगु दु। बहुमतीय प्रणालीइ वनेधुंकाः आः थःपिनिगु नेतृत्वय् गुगु कथं सरकार दयेकेगु धइगु खँय् सहलह ब्याकेत थौं बैठक च्वनेत्यंगु खः ।
