स्वयम्भु यातायातया रुट खारेजी माग
येँ (सन्ध्या टाइम्स)/हानं गाडीं क्यलाः मनू स्याःगु स्वयम्भु यातायातयाके पीडित पक्षं १५ लाख तका क्षतिपूर्ति माग यायेवं समस्या तच्वः जुया वंगु दु। स्वयम्भु यातायातया गाडीं क्यलाः सीम्ह लीलावल्लभ पाण्डेया थःथितिपिंसं १५ लाख तका क्षतिपूर्ति नापं स्वयम्भु यातायातया रुट हे खारेज यायेमाःगु माग याःगु खः ।
स्वयम्भु यायातातं थ्व माग पूरा मयाःतले सीम्ह मनूया लाश तकं उठे मयायेगु अडान वया थःथितिपिंसं काःगु दु। सीम्ह आः टिचिङ्ग अस्पतालया पोष्ट मार्टम यायेथाय् तयातःगु दु ।
स्वयम्भु यातायातं तःक्वःमछि हे मनू क्यलाः स्यायेधुंकूगु कारणं थःपिंसं थ्वया रुट लाइसेन्स हे खारेज यायेमाःगु माग यानागु खँ पीडित परिवारं धाःगु दु। स्वयम्भु यातायातं धाःसा बीमा मार्फत वइगु ५ लाख तका दामय् मेगु छगू लाख तना बीगु तक खँ धायेधुंकूगु दु ।
वंगु छुं ई न्ह्यः चाबहिली स्वयम्भु यातायातं मनू क्यलाः स्याना बीवं थुकियात रुट खारेज यानाः छानबिन यानाच्वंगु खःसा छानबिन सिमधःनिवं हे हां मनू स्याःगुलिं मनूत तच्वयाच्वंगु दु। थ्व गाडीं वंगु सोमवाः बालाजु ब्याट्री कारखानाया नापसं ठक्कर नकाः लँजुयाः लिलाबल्लभ पाण्डेयात स्याना बिउगु खः ।
