पूर्ण बजेट मवःसा संकट: पाण्डे
येँ (सन्ध्या टाइम्स)/अर्थ मन्त्री सुरेन्द्र पाण्डें याकनं पूर्ण बजेट हये मफुत धाःसा देयय्या अर्थतन्त्रय् हे झन् शिथिल जुया वनाः थप आर्थिक संकटय् लाइगु खँ कनादीगु दु ।
आर्थिक दँ शुरु जुइ न्ह्यः हे बजेट हयाः विकास खर्चयात प्रभावकारी दयेकेमाःगु आवश्यक जूगु इलय् लगातार स्वक्वः तक नं आर्थिक वर्षया बजेटयात राजनीति कारणं प्रभावित यायेगु ज्या जूगु खँय् दुःख नं प्वंकादीगु दु ।
वर्तमान इलय् कामचलाउ सरकार जक दुगु कारणं पूर्ण बजेट पेश याये मजियाः म्हिगः पेस्की बजेट पेश याये धुंकाः अर्थ मन्त्रालयय् जूगु पत्रकार सम्मेलनया झ्वलय् मन्त्री पाण्डें यदि याकनं पूर्ण बजेट हये मफुत धाःसा न्हूगु योजनाय् लगानी व बहुवर्षिय योजना ठेक्का जक प्रभावित जुइगु मखसे राजस्व म्हयेगु नं प्रभावित जुइगु दावी यानादीगु दु ।
राजनीतिक कचवं ब्वलनाच्वंगु कारणं हे जन आकांक्षा कथं जिम्मेवारी पूरा यायेगु ज्या तःक्वःमछिं हे असफल जूगु नं मन्त्री पाण्डें स्वीकार यानादीगु दु ।
थगुने इलय् हे बजेट वःगु खःसां उकियात छलफल यानाः पास यायेत जक हे न्याला स्वयां अप्वः ई काःगु खः। नगुने असोजं जक पूर्ण बजेट वःगु खः ।
