एमालें हाकन संसद बहिष्कार
सत्तारुढ नेकपा एमालें बुटवलय् हत्या जुम्ह युथफोर्सया कार्यकर्ता प्रचण्ड थैवया हत्यारायात सरकारं मज्वंगु धासें बुधवाः नं व्यवस्थापिका संसदया बैठक बहिष्कार याःगु दु । एमालें संसद बहिष्कार याःगु थ्व प्यक्वःगु खुशी खः ।
एमालेया सभासद् रामजी शर्मां हत्यारा सुजित विकयात ज्वनेगु पलेसाः माओवादीं उल्टां बिस्का छ्वःगु धासें संसद बहिष्कारया घोषणा याःगु खसाः उकीयात कांग्रेसया सभासदतय्सं सर्मथन याःगु खः । बुधवाः पोखराय् जूगु छगू ज्याझ्वलय् एमाले अध्यक्ष झलनाथ खनालं बुधवाःया संसद बहिष्कार मयायेगु धयादीगु खः । बहिषकार लिपाः बुधवाः नं कार्यसूची हे दुहांमवंकं संसद शनिवाः तकःया निंतिं स्थगित याःगु दु ।
संसद बैठकय् देशय् अप्वयाच्वंगु हत्या, हिंसा दिकेमफुगुलिं सरकार पूर्णरुपं असफल जूगु व एमाले कार्यकर्ता प्रचण्ड थैवया हत्यारायात मज्वंगुलिं सत्ता साझेदार एमाले, प्रमुख प्रतिपक्षि दल कांग्रेस लगायत मेमेगु दलतय्सं सरकारया त्वच्वयेक विरोद्ध याःगु दु ।
बुधवाःया बैठकय् न्ववासें कांग्रेस नेता प्रकाश शरण महतं थैवया हत्यारायात माओवादीं संरक्षण बियातःगु द्वपं बियादिल । अथेहे वयेकलं विधिया शासनयात संरक्षण याये त्वःता उल्टां संसदीय व्यवस्था ज्यालकेमजू धाकाः धाइगु माओवादीया अभिव्यक्ति प्रति अपत्ति प्वंकादिल । नापं वयेकलं प्रधानमन्त्री थःपिनिगु गुंगू बुँदे माग पूमवंकूगु व थंज्याःगु अवस्थाय् संसदय् मुकदर्शक जुया च्वनाच्वनेगु छुं अर्थ मदु धयादिल ।
एमालेया सभासद सावित्रा भुसालं वाइसीएलया गतिविधि न्ह्यावलें विवादास्पद जूगु व बुटवलया घटनाय् नं वाइसीएलया ल्हाः दुगु खँ धयादिल । संयुक्त सरकारया बांलाःगु ज्याया जस दक्वं माओवादीं काइगु व बांमलाःगु ज्याया अपजस दक्वं एमालेयात बीगु धयादिल । थंज्याःगु हे अवस्था खसाः संविधान च्वयेगु ज्या अवरुद्ध जूइगु ख्याच्वः नं वयेकलं बियादिल ।
माओवादी सभासद सीपि गजुरेलं सत्ता साझेदार एमालेया आलोचना यानादिल । गजुरेलं एमालेया निगू ख्वाःपाः दुगु धासें सुविधा कायेगु इलय् सरकारया दुजःथें जुइगु व मेगु इलय् प्रतिपक्षया थें व्यवहार याइगु द्वपं बियादिल । अथेहे वयेकलं प्रचण्ड थैवया हत्यारा सुजित विकयात सर्वजनीक यायेत्यंवलय् फरार जूगु व अपराधी ज्वनेत माओवादीं सरकारयात ग्वहालि याइ धयादिल ।
अथेहे कांग्रेस सभासद महतया गज्याःगु कथंया गणतन्त्र माःगु धकाः न्यंगु न्ह्यसःया लिसः ब्यूसें नेता गजुरेलं धयादिल - 'झीसं धइगु गणतन्त्र नेपाःया थंज्याःगु गणतन्त्र खः ।' वयेकयलं नेपाःया थंज्याःगु गणतन्त्र धकाः बहुदली प्रतिस्पर्धा दुगु जनगणतन्त्र प्रति इंगित यानादिल ।
व्यवस्थापिका बैठकय् मधेशी जनअधिकार फोरमया आत्मराम प्रसाद शहा, तमलोपाया वृजेशकुमार गुप्ता, नेपाल सद्धभावनाया अनिल कुमार झा व नेकपा मालेया सीपि मैनालिं माओवादी व वया भातृ संगठनया ज्याया आचोलना याःगु खः । अथेहे राष्ट्रिय प्रजातन्त्र पार्टीपाखें सभासद जुयादिम्ह पुलाम्ह प्रधानमन्त्री लोकेन्द्र बहादुर चन्दं राज्य पुर्नसंरचना आयोग गठन यायेत माग यानादीगु खः ।
