एमआरपी विवादय् लेखाया छानबीन
येँ (सन्ध्या टाइम्स)/मेसिन रिडेबल पासपोर्ट (एमआरपी) छपाई प्रकरणयात कयाः संसदीय व्यवस्था अन्तर्गत सार्वजनिक लेखा समितिं छानवीनया ज्या न्ह्याकूगु दु ।
सिंहदरवारय् च्वंगु समितिया ज्याकुथिइ च्वंगु बैठकं छानवीनया झ्वलय् परराष्ट्र मन्त्रालयया सचिव व शिष्टाचार महापाल लगायत सम्बन्धि अधिकारीतय्त सःताः एमआरपी छपाईया बारे न्यनेकने याःगु खः ।
परराष्ट्र मन्त्रालयया सचिव मदन भट्टराईं न्यनेकनेया झ्वलय् एमआरपी छपाई ठेक्का बारे समितिया जानकारी बिसें सार्वजनिक खरिद नियमावली कथं हे ठेक्का बीगु ज्या जूगु दावी यानादीगु खः ।
अथे हे समितिं शिष्टाचार महापाल लगायतया सम्बन्धि अधिकारीतय्के नं एमआरपी छपाईया ठेक्का बारे पिहां वयाच्वंगु विवादयात कयाः न्यनेकने याःगु खः। एमआरपी छापे यायेगु निंतिं फ्रान्सया ओबरथर टेक्नोलोजिजयात ठेक्का बीगु मन्त्रालयया निर्णया कारणं हानं नं विवाद पिहां वयेवं लेखा समितिं छानवीनया प्रक्रिया न्ह्याकूगु खः ।
समितिं एमआरपी छपाई ठेक्का बारे पिहां वःगु विवाद लिपा म्हिगः परराष्ट्रया सचिव व शिष्टाचार महापाल लगायतया अधिकारीतय्के न्यनेकेने याये धुंकाः थौं हानं बैठक च्वनाः थुकिया विषयस आधिकारीक धारणा क्वःछीगु समितिया छम्ह दुजलं जानकारी बिउगु दु ।
सार्वजनिक लेखा समति थ्वयां न्ह्यः ऐन अःखः भारतयात एमआरपी छापे याकेगु मन्त्रिपरिषद्या निर्णययात कयाः तच्वकं विवाद पिहां वयेवं आः वयाः मन्त्रालयं फ्रान्सया उगु कम्पनीयात छापे याके बीगु निर्णय याःगु खः। तर एमआरपी छापे यायेगु निंतिं टेण्डर तःगु मेमेगु कम्पनीं ओबरथरं उपलब्ध याइगु एमआरपीया गुणस्तर कमजोर जक मखसे सुरक्षा दृष्टिकोणं नं तसकं जोखिम दुगु दावी यायेवं थ्व विवाद पिहां वःगु खः ।
