कार्यतालिका कार्यदेश कथं हे दु : राष्ट्रसंघ
संयुक्त राष्ट्रसंघया महासचिव वानकी मुनया सहप्रवक्ता फरहान हकं अनमिनं सार्वजनिक याःगु माओवादी लडाकुया समायोजन व पुनःस्थापना सम्बन्धि कार्यतालिका अनमिनया कार्यदेश कथं हे जूगु खँ धयादीगु दु । वय्कलं नेपाःया प्रमुख राजनीतिक दलत नापया सहलह व सरकारया पूर्ण जानकारीलय् कार्यतालिका तयार यानागु खँ धयादीगु दु ।
सोमवाः राष्ट्रसंघया न्यूयोर्क स्थित मुख्यालयय् वय्कलं माओवादी लडाकुया समायोजन व पुनःस्थापनाया सम्बन्धय् राजनीतिक निर्णययात सहलह यायेत व ग्वाहालि यायेत कार्यतालिका तयार यानागु जानकारी बियादिल ।
अनमिनं लडाकु समायोजन व पुनःस्थापनाया निंतिं ६० हप्ता ताःहाकगु कार्यतलिका सार्वजनिक यायेवं प्रधानमन्त्री माधवकुमार नेपालं कार्यदेश उल्लंघन याःगु धासें आपत्ति प्वंकादीगु खःसा कांग्रेस कार्यवाहक सभापति सुशील कोइरालां नं अनमिनं माओवादीया पक्ष काःगु धासें आपत्ति प्वंकाच्वनादीगु दु ।
