चिनियाँ व्यापारी लुटपाटय् माओवादी नेताया संलग्नता
चिनियाँ व्यापारी लुटापाटया घटना माओवादी केन्द्रीय दुजःया योजना कथं जूगु खँ सिदुगु दु । स्वन्हु न्ह्यः येँ लुटे जूपिं स्वम्ह चिनियाँ व्यापारी पाखें लुटे यानाः यंकूगु ध्यबा व यार्चा प्रहरीं माओवादी लडाकु स्वंगू डिभिजन शक्तिखोरया ब्रिगेडियर कालीबहादुर खामया बालं च्वनाच्वंगु कोठाय् लुइकेवं प्रहरीं माओवादी नेताया संलग्नताय् लुटपाट जूगु दाबी याःगु दु ।
लुटापट लिपा प्रहरीं याःगु अनुसन्धान व उगु लुटपाटय् संलग्न जूपिं च्याम्हेसित ज्वने धुंकाः आइतवाः बहनी गोंगबु स्थित खाम च्वनाच्वंगु कोठाय् छापा मारे याःगु इलय् चिनियाँ व्यापारी पाखें लुटे याःगु ४ लख, ७ किलो ७ सय ७१ ग्रामया यार्चागुम्बा बरामद याःगु खः ।
प्रहरीं खामया कोठां इन्सास राइफलया प्यंगू राउण्ड गोली, म्यागनम राइफला निगू राउण्ड गोली, चाइनिज पेस्तोलया छगू राउण्ड गोली, रेन्जर पोस्टया स्ट्याम्प, वन अधिकृत शंकरप्रसाद गुप्ताया स्ट्याप्म लगायत थीथी भ्वँ व ना. १. च. ८७३६ नम्बरया स्यान्ट्रो कार नं बरामद याःगु दु ।
यार्चा काःवंपिं स्वंम्ह चिनियाँ व्यापारीत शुक्रवाः बहनी न्हूगु बसपार्कया नवमित्र गेष्टहाउस पाखें २६ लख २० हजार ध्यबा लुटे याःगु खः । लुटपाटय् संलग्न जूगु आशंकाय् प्रहरीं रुकुमया गणेशबहादुर मल्ल, पाल्पाया लालबहादुर राना, तनहुँया मिलनसेन ठकुरी, दाङया मघुसूदन शर्मा, रुकुमया जितेन्द्र बुढामगर, कर्मशाही घर्ती, सौगात बुढामगर व नुवाकोटया अशोक खातीया ज्वंगु दु ।
लुटपाटया योजनाकार खामयात धाःसा ज्वने मफुनीगु खँ प्रहरीं धाःगु दु । खाम स्वदँ न्ह्यः येँया कोटेश्वरया व्यापारी रामहरि श्रेष्ठ हतयाकाण्डया मुख्य अभियुक्त नं खः ।
