कांग्रेसया नेतृत्वय् सरकार : कोइराला
नेपाली कांग्रेसया कार्यवाहक सभापति सुशिल कोइरालां कांग्रेस नेतृत्वया सरकार गठन जुइगु सम्भावना अप्वःगु खँ धयादीगु दु ।
मंगलवाः सुथय् नेपालगञ्जय् पत्रकारत नाप खँल्हाबंला यानादिसें वय्कलं मेगू दलया नेतृत्वय् सरकार गठन जुइगु सम्भावना मदुगुलिं आः कांग्रेसं सरकारया नेतृत्व याइगु धयादिल । वय्कलं माओवादी व एमाले नेतृत्वया सरकारं शान्ति प्रकृया व संविधान निर्माण यायेमफुगु व उगु सरकार असफल जूगु धयादिल । कांग्रेस पाखें सरकारया नेतृत्व संसदीय दलया नेतां हे याइगु नं वय्कलं स्पष्ट यानादिल ।
माओवादी दकलय् तःधंगु दल जुसां वं थःगु जिम्मेवारी पूवंकेमफुगु द्वपं बियादिसें कोइरालां आः तक सहमति जुइमफुगुया जिम्मेवारी माओवादीं कायेमाःगु धयादिल । नेपाः स्थित राष्ट्रसंघीय मिसन अनमिनं पक्षपातपूर्ण व्हवहार याःगु खँ धयादिसें वय्कलं अनमिनया भूमिका प्रति असन्तुष्टि प्वंकादिल ।
