२ गतेनिसें मनपाय् नेवाःतय् तालाबन्दी

येँ (सन्ध्या टाइम्स)/नेवाः स्वायत्त राज्य मंकाः संघर्ष समितिं नेवाः स्वायत्त राज्यया अवधारणा कथं येँ महानगरपालिकाय् ज्या याके बीगु निंतिं थ्वहे वइगु २ गतेनिसें दबाबमुलक न्ह्याकीगु जूगु दु। थौं मंकाः संघर्ष समितिया नेतृत्वय् वंगु छगू पुचलं येँ मनपायात सचेतपौ लःल्हाःगु खः। उगु ज्याझ्वलय् सभासद् बुद्ध साय्मि, मनपाया दलीय संयन्त्रय् माओवादी प्रतिनिधि सर्वोत्तम डंगोल, एमाले प्रतिनिधि बसन्त मानन्धरपिंसं नं संघर्ष समितिया पक्षय् न्ववानादीगु खःसा कार्यकारी अधिकृतं साउन २ गते न्ह्यः हे माग पूवंकेगु आश्वासन बियादीगु खः ।

मनपां कर्मचारी भर्नाया निंतिं पुलांगु राज्यया संरचना कथं प्रक्रिया न्ह्याकूगुलिं उकियात आः हे रद्द यायेमाःगु, मनपाय् नेवाः डेस्क पलिस्था यायेमाःगु, मनपाया कुल बजेटय् नेवाः भाय्, साहित्य, संस्कृति, लिपि आदि ख्यःया नितिं २५ प्रतिशत फ्याये माःगु, नेवाः सम्पदा, संस्कृति नाप स्वापू दुगु विशेष महाशाखा दयेकेमाःगु, मनपाया विज्ञापन, सुचं, आदि नेवाः भासं पिथनेमाःगु, नेवाः लिपि व नेवाः साइन बोर्ड तइपिं करय् ७५ प्रतिशत छुट बीमाःगु माग याःगु दु। यदि साउन १ गते तकया दुने माग पूरा मजुल धाःसा २ गते कार्यकारी अधिकृतया ज्याकुथी धर्ना च्वनेगु, प्रशासन विभागय् तालं ग्वयेगु, ४ गते पदपूर्तिया ज्याकुथी तालं ग्वयेगु, ५ गते येँया फुक्क वडा ज्याकुथी तालं ग्वयेगु, ७ गते कर्मचारी भर्नाया निंतिं अन्तर्वार्ता कायेगु धयातःगु राष्ट्रिय सभागृहय् जुलुसनापं धर्ना च्वनेगु अले ९ गतेनिसें मनपाया मू ज्याकू बागदरवारय् हे तालं ग्वयेगु ज्याझ्वः दयेकातःगु दु ।

संघर्ष समितिया नायः राजकाजी
नेवाः स्वायत्त राज्य मंकाः संघर्ष समितिया नायः लय्लय्पतिं हिलेगु प्रावधान कथं थनिंनिसें ज्यापु समाज यलया नायः राजकाजी अवाले संघर्ष समितिया नायः जुयादीगु दु। तिथि कथं पारु कुन्हु नायः हिलेगु मंकाः संघर्ष समितिया प्रावधान दयेकातःगु खःसा म्हिगः तक ज्यापु महागुथिया नायः बिपेन्द्र महर्जन थुकिया नायः जुयादीगु खः ।