थपे याना बिउगु म्याद नं थौं फुइगु
येँ (सन्ध्या टाइम्स)/राष्ट्रिय सहमतिया सरकार दयेकेत एकीकृत माओवादी, नेपाली कांग्रेस व एमालें थौं सनिलय् तक कुतः याइगु जूगु दु ।
राष्ट्रपति डा. रामवरण यादवं २५ दलया इनाप कथं राष्ट्रिय सहमतिया सरकार दयेकत थपे याना बिउगु न्यान्हुया म्याद थौं फुइत्यंगु दु। उकिं दलया नेतात हथाय्चायाः थौं सुथंनिसें हे तयारी याःगु दु। अथे हे राष्ट्रिय सहमतिया सरकार दयेकेगु निंतिं ततःधंगु दलत मिले जुइ माल धकाः संविधानसभाय् दुथ्याःगु चिचीधंगु झिंछगुलिं मल्याक दलया नेतात थौं हे तराई मधेश लोकतान्त्रिक पार्टीया ज्याकू सिंहदरवारय् मुनाच्वंगु दु ।
थौंया दुने दलतय् दथुइ राष्ट्रिय सहमतिया सरकार दयेकेत सहमति मजुल धाःसा कन्हसंनिसें बहुमतीय प्रणालीया आधारय् न्हूगु सरकार दयेकेगु प्रक्रिया शुरु याये माली ।
बहुमतीय प्रणालीइ वन धाःसा हाकनं क्वःछिनातःगु इलय् न्हूगु संविधान दयेके मफइगु नापं दलत सरकार क्वःथलेगु ज्याय् जक न्ह्याः वनी धकाः मनूतय्सं तायेकाः प्यखेरं राष्ट्रिय सहमतिया सरकारया नितिं दबाव बीगु ज्या जुयाच्वंगु खः। थ्वहे दथुइ संविधान निर्माणया निंतिं कार्यतालिका दयेकेगु निंतिं धकाः संविधानसभाया नायः सुवास नेम्वाङया कुतलय् च्वंगु स्वंगू दलया नेतातय्गु मुँज्या बिना निष्कर्ष क्वचाःगु दु ।
