सद्भावनाय् सरितायात षडयन्त्र
येँ (सन्ध्या टाइम्स)/देशय् न्हूगु सरकार गठनया तयारी जुइवं नेपाल सद्भावना पार्टी दुने ल्वापु नं शुरु जूगु दु ।
नकतिनि हे उगु पार्टीया अध्यक्ष सरिता गिरीयात पार्टीया मानार्थ अध्यक्ष आनन्दीदेवीं पार्टीं हे निष्काशन याःगु समाचार पिहां वःगु दु। तर पार्टी अध्यक्ष सरिता गिरीं धाःसा थःत पार्टीं निष्काशन याःगु थ्व समाचार हल्ला जक खः धासें आखः मसःम्ह मानार्थ अध्यक्ष आनन्दी देवीया नामं मेपिंसं हे वक्तव्य दयेकाः पित बिउगु खँ कनादीगु दु। वय्कलं थ्व वक्तव्ययात सुनां नं पत्याः मयायेत नं इनाप यानादीगु दु ।
वक्तव्यय् अध्यक्ष गिरीं लोकतन्त्र व मधेशवादी मूल्य व मान्यताया अःखः ज्या याःगु कारणं वय्कःयात पार्टीं हे खुदँया लागिं निष्काशन यानागु खँ उल्लेख यासें आः वय्कःयात सभासद् पदं नं चीकेगु लागिं राष्ट्रपति डा. रामवरण यादवयात पौ च्वये त्यनागु खँ नं उल्लेख दु ।
थौंकन्हय् माओवादीयात समर्थन यानाच्वंम्ह मय्जु गिरी यदि माओवादीया नेतृत्वय् सरकार गठन जुल धाःसा उकी मन्त्री जुइफु धइगु चर्चा पिहां वःगुलिं सद्भावना पार्टी दुने थज्याःगु चलखेल जूगु अनुमान दु ।
