स्वनिगलय् जक सुकुम्बासीया ७८ गू वस्ती
येँ (सन्ध्या टाइम्स)/स्व्निगलय् पिनें वयाः छेँबुँ न्यानाः च्वं वइपिं मनूतय् ल्याः अप्वल धकाः स्थानीय मनूत हालाच्वंगु हे इलय् हे उखे स्वनिगःया जग्गा अतिक्रमण यानाः च्वं वइपिं सुकुम्बासीतय् ल्याः नं धमाधम अप्वया वनाच्वंगु खँ सीदुगु दु। थ्व सुकुम्बासीतय्सं थःत सुनां नं जबर्जस्त थं वल धाःसा उकिया सामना यायेत धकाः थीथी कथंया संघ संस्था नं दयेकातःगु दु। अज्याःगु हे छगू संस्था नेपाल लोकतान्त्रिक सुकुम्बासी संघं बिउगु जानकारी कथं थौंकन्हय् स्वनिगलय् च्वनाच्वंपिं सुकुम्बासीतय् ल्याः ४० द्वः थ्यनेधुंकूगु दु ।
थ्व सुकुम्बासीत स्वनिगःया मनोहरा, बागमति, विष्णुमति खुसिया सिथय् व मेगु सार्वजनिक जग्गाय् नं च्वनाच्वंगु दु। स्वनिगः दुने जक थुमिगु ७८ गू वस्ती दयेधुंकूगु खँ नं धाःगु दु ।
सुकुम्बासी समस्या समाधान यायेत धकाः राज्यं आः तक च्यागू सुकुम्बासी आयोग गठन यायेधुंकूगु दु तर छगू हे आयोगं छुं ज्या धाःसा यायेफुगु मदुनि। आयोगतय्सं समस्या समाधानपाखे ध्यान मबिउगु कारणं यानाः हे स्वनिगलय् तकं सुकुम्बासीतय् ल्याः अप्वया वंगु खँ धाःगु दु ।
