जनरलतय् म्याद तनेगु अधिकार सरकारया : महान्यायाधिवक्ता
महान्यायाधिवक्ता राघवलाल वैद्यं नेपाली सेनाया जनरलतय् म्याद तनेगु व मतनेगु अधिकार सरकारय् दुगु खँ धयादीगु दु ।
सर्वोच्च अदालतय् बुधवाः जूगु सुनुवाइलय् बहसयासें वयेकलं थ्व सरकारया तजबिजी अधिकार खः धकाः जिकिर यानादीगु दु । थंज्याःगु अवस्थाय् जनरलतय् दावी निश्प्रभावी जूगु वयेकया दाबी दु ।
सेनाया च्याम्ह ब्रिगेडियर जनरतय्त अवकाश बीगु सरकारया निर्णय कार्यन्वयन मयायेत ब्यूगु अन्तरिम आदेश बदर यायेगु वा मयायेगु बारे बुधवाःनिसें न्यायाधीश अनुपराज शर्मा व प्रेम शर्माया इजलाशं सुनुवाई न्ह्याकूगु दु ।
संविधान व ऐनय् मदुगु पुलांगु नियमावलीयात कया जूगु अन्तरिम आदेश असंवैधानिक जूगु धासें महान्यायाधिवक्ता वैद्यं पदावघि सिधेका अदालत वयेगु हक सैनिक अधिकृतत नाप मदु धयादिल ।
बुधवाः जूगु बहसय् सरकारया पाखें सरकारी वकिलं जकः बहस यात । मेगु बहस बैशाख ६ गते जुइ ।
रक्षा मन्त्रालयं थःगु पाखें बहस याये वरिष्ठ अधिवक्तात कृष्णप्रसाद भण्डमरी, व रामनाथ मैनाली, नेपाल बार एशोसिएसनया महासचिव रमण श्रेष्ठ, कोषाध्यक्ष सविता भण्डारीलगायत झिंनिम्ह कानुन व्यावसायीत नियुक्त यानात:गु दु ।
चैत १० गतेया सर्वोच्चया अन्तरिम आदेश बदर यायेत माग यासें तत्कालीन रक्षासचिव वामनप्रसाद न्यौपानें निवेदन ब्यूगु खः ।
