१ खर्ब १० अर्बया पेस्की बजेट
येँ (सन्ध्या टाइम्स)/अर्थ मन्त्री सुरेन्द्र पाण्डें थौं सदनय् वर्तमान अवस्थाय् ज्या चले यायेत १ खर्ब १० अर्ब २१ करोड तकाया पेस्की बजेट पेश यानादीगु दु ।
सरकार कामचलाउ जूगु कारणं पूर्ण बजेट पेश याये मजियाः थौं पेस्की बजेट जक निं पेश याःगु खः। थ्व बजेटय् विनियोजन यानातःगु दां देशय् आः मुनाच्वंगु धुकुतिं लिकयाः नं खर्च यायेगु कथं थ्व बजेट दयेकूगु खः। थ्व बजेटयात देशय् आः वयाच्वंगु समस्या समाधान यायेत वःगु कामचलाउ बजेटया रुपय् नं कायेगु याः ।
अन्तरिम संविधानया धारा ९६ या 'राजस्व व व्यव सम्बन्धी विशेष' व्यवस्थाय् कामचलाउ अर्थमन्त्रीं चालु बजेटया व्ययया स्वब्वय् निब्व स्वयां अप्वः मजुइ कथं बजेट दयेकाः पेश याये जिउ धयातः कथं थ्व बजेट पेश याःगु खः ।
थज्याःगु बजेट विधेयक गुकुन्हु पेश याःगु खः वकुन्हु हे सांसदतय्सं छलफल यानाः पारित याये जिउ। उकथं थौं हे थुकी सभासदतय्सं सहलह नं ब्याकूगु दु। थुकी थौं हे छलफल क्वचायेकाः थौं हे पारित याइगु खँ दु। सकलें दलतय्गु सहमति कयाः पेश याःगु बजेट जूगुलिं थुकियात सकस्यां सहमति हे बीगु अनुमान यानातःगु दु ।
