राष्ट्रपति पाखें बहुमतीय सरकार गठन यायेत आह्वाऩ

सहमतिय सरकार गठन यायेगु ईया दुने राष्ट्रिय सहमतिय सरकार गठन मजुइवं राष्ट्रपति डा. रामवरण यादवं बुहमतया सरकार गठन यायेत आह्वान यानादीगु दु ।

सोमवाः सनिलय् व्यवस्थापिका संसदय् पौ छ्वयादिसें राष्ट्रपति यादवं संविधानया धारा ३८ (१) कथं १२न्हु तक नं सहमतिय सरकार गठन मजूगुलिं धारा ३८ (२) कथं बहुमतया सरकार गठनया निंतिं आह्वान यानादीगु दु ।

राष्ट्रपति यादवं वंगु असार १७ गते अन्तरिम संविधानया धारा ३८ (१) कथं न्ह्यन्हुया दुने सहमतिय सरकार गठन यायेत आह्वान यानादीगु खःसा उगु ईया दुने सरकार गठन मजुइवं संविधानसभाय् दुथ्याःगु २५गू दलया इनापय् न्यान्हु थप यानादीगु खः ।

थौं सहमतिय सरकार गठन यायेगु अन्तिम न्हि कुन्हु च्वंगु प्रमुख स्वंगू दलया बैठकय् नं सहमति मजुइवं राष्ट्रपतिं बहुमतया सरकार गठन यायेत आह्वान यानादीगु खः ।