दलत दथुइ सहमति मजुइवं आ: बहुमतीय सरकार गठन जुइगु
सहमतिय सरकार गठनया निंतिं राष्ट्रपति डा. रामवरण यादवं निक्वःगु खुसिइ बियादीगु ई क्वचाये छुं ई न्ह्यः च्वंगु प्रमुख स्वंगू दलया बैठक नं बिना निष्कर्षय् क्वचाःगु दु । थ्व नापं आः सहमतिय सरकारया सम्भावना म्हो जूगु दुसाः न्हूगु गठन जुइगु सरकार बहुमतीय आधारय् हे गठन जुइगु प्राय निश्चित जूगु दु ।
सोमवा: येँया न्हू बानेश्वर स्थित संविधानसभाया भवनय् च्वंगु एनेकपा (माओवादी), नेपाली कांग्रेस व नेकपा (एमाले) दथुइया बैठकय् सेना समायोजन व पुनःस्थापनाया विषयलय् खँ मिले मजुइवं न्हूगु सरकार गठन नं अन्यौलय् लाःगु खः ।
बैठकय् कांग्रेस व एमालें माओवादीं पेश याःगु सेना समायोजनया प्रस्तावय् असहमति प्वंकूसें स्पष्ट व सेनाय् समायोजन जुइगु लडाकुया ल्या किटान यायेमाःगु अडान काःगु खःसा माओवादीं आः हे लडाकूया ल्या क्वःछी मफइगु खँ धाःगु खः ।
सहमतिय सरकार गठन यायेगु ई दुने स्वंगू दल दथुइ सहमति मजुसां दलतय्सं बहुमतिय आधारय् गठन जुइगु सरकारयात सहमतिय स्वरुप बीगु खँ धाःगु दु । बैठक लिपा एमाले अध्यक्ष झलनाथ खनालं प्राविधिक रुपं बहुमतीय आधारय् वंसां बहुमत दुने पाखें सहमति मालेगु खँ धयादिल ।
राष्ट्रपति यादवं अन्तरिम संविधानया घारा ३८ (१) बमोजिम सहमतिय सरकार गठन यायेत राजनीतिक दलतय्त न्ह्यन्हुया ई बियादीगु खःसा उगु ईया दुने सहमति मजुइवं २५गू दलया इनापय् न्यान्हुया ई थप यानादीगु खः ।
