न्हूगु सरकार याकनं गठन यायेत प्रमया इनाप
प्रधानमन्त्री माधवकुमार नेपालं यथासीघ्र न्हूगु सरकार गठनया निंतिं पहल यायेत इनाप यानादीगु दु ।
सोमवाः व्यवस्थापिका संसदया बैठकय् न्ववानादिसें प्रधानमन्त्री नेपालं थम्हं राष्ट्रिय सहमतिया सरकार गठन यायेत राजीनामा बियागु धयादिसें सरकारं राजीनामा बिधुंका नं राष्ट्रिय सरकार गठन मजूगु प्रति असन्तुष्टि प्वंकादिल ।
वय्कलं सरकारं राजीनामा बीधूंकाः आः देय् विशेष अवस्थाय् दुगु धयादिसें थंज्याःगु अवस्था ताः ई तक कायम जुइमज्यूगु धयादिल । वय्कलं थुकी माओवादी जिम्मावर जूगु द्वपं नं बियादिल । माओवादीं पुलांगु सहमति पालना मयागुलिं हे समस्या वःगु बिचाः वय्कलं प्वंकादिल ।
झिंप्यलाया थःगु नेतृत्वया सरकारया पालय् प्रमुख प्रतिपक्षी माओवादीं ग्वाहालि मयागुलिं सरकारयात सहमतिया वातावरण दयेकेत थाकूगु धयादिसें अज्याःगु इलय् नं विकास निर्माणया ज्या न्हापालिपा स्वयां अप्व जूगु धयादिल । वय्कलं थःगु कार्यकालय् न्हापाया वैदेशीक ग्वाहालिया तुलनाय् निदुगं अप्व जूगु दावी नं यानादिल ।
