सुजित विक माओवादीपाखें निस्कासित

बुधवाः च्वंगु एकीकृत माओवादीया सचिवालय बैठकं बुटवलया युथफोस्र दुजः प्रचण्ड थैवया हत्याया द्वपं बियातम्ह सुजित विकयात पार्टीया साधारण दुजःलं चीकाछ्वःगु दु ।

बैठकलिपा पत्रकारतय्त जानकारी ब्यूसें सचिवालय दुजः नारायणकाजी श्रेष्ठं - 'विक बिस्यूवनेवं शंका यायेगु थाय् दत । थौंया सचिवालय बैठकं वयात साधरण दुजलं तकं चीकूगु दु ।'

राष्ट्रिय मानवअधिकार आयोगय्यंका पत्रकारतय् न्ह्यने सार्वजनिक यायेगु तयारी यानाच्वंगु इलय् विक बिस्यूवंगु खँ श्रेष्ठं कनादिल ।

माओवादीं विकयात ज्वनेत सरकारया इनाप नापं पार्टीं हत्यारायात ज्वनेत ग्वहालि यायेगु प्रतिबध्दता प्वंकूगु दु । अथेहे थः स्थानीय कार्यकर्तातय्त नं हत्यारा ज्वनेत ग्वहालि यायेत इनाप या:गु दु ।

नापं बैठकं सदन सुचारु यायेत एमाले व कांग्रेसनाप थप सहलह यायेगु निर्णय याःगु दु ।