'माओवादी प्रस्ताव शान्ति सम्झौता विपरीत'
एकीकृत नेकपा (माओवादीं) शनिवाः सार्वजनिक याःगु सेना समायोजन व पुनःस्थपना सम्बन्धी प्रस्तावयात नेपाली कांग्रेसं शान्ति सम्झौता विपरीत जूगु खँ धाःगु दु ।
माओवादी प्रस्ताव बारे सहलह यायेत आइतवाः कांग्रेस मू ज्याकू सानेपाय् च्वंगु पार्टी केन्द्रीय कार्यसमितिया बैठकं माओवादीया प्रस्ताव शान्ति सम्झौता वपरीत जूगु ठहर याःगु दु । बैठकय् कांग्रेस नेतातय्सं छपु ल्वाभः छम्ह लडाकुया ल्याख्यं जक सेना समायोजन यायेमफइगु बिचाः प्वंकूगु खः ।
अथेहे कांग्रेसं नेपाः स्थित राष्ट्रसंघीय मिसन अनमिनया म्याद यायेमज्यूगु धासें संविधान निर्माण व सेना समायोजन नापनापं यायेमाःगु खँ धाःगु दु । कांग्रेसं माओवादी प्रस्तावया बारे पार्टीया आधिकारीक धारणा मंगलवाः च्वनीगु केन्द्रीय समितिया बैठकं क्वःछीगु खँ धाःगु दु ।
थुकीया निंतिं उपसभापति रामचन्द्र पौडेल, महामन्त्री विमलेन्द्र निधि, केन्द्रीय दुज:त महेश आचार्य, डा. रामशरण महत, कृष्ण सिटौला, मिनेन्द्र रिजाल व चिरञ्जीवी वाग्लेयात जिम्मा ब्यूगु दु । थुगु पुचलं सोमवाः एमाले नाप सहलह यानाः थःगु आधिकारीक धारणा क्वःछीगु जूगु दु ।
