मनपाय् नेवाः कर्मचारी गुथि नीस्वन
येँ (सन्ध्या टाइम्स)/स्थानीय निकायया कर्मचारीतय्गु इतिहासय् न्हापांखुसि येँ महानगरपालिकाया नेवाः कर्मचारीतय्गु वंगु शुक्रवाः जूगु तःजिगु भेलां येँ महानगरपालिका नेवाः ज्याकःमि गुथि नीस्वंगु दु ।
देय्न्यंकंया नगरपालिका मध्ये छगू जक महानगरपालिका येँ महानगरपालिकाय् नेवाः स्वायत्त राज्यया अवधारणा कथं ज्या याके बीगु नितिं भूमिका म्हितेत उगु कथं नेवाः ज्याकःमि गुथि नीस्वंगु खः ।
नेवाः स्वायत्त राज्य मंकाः संघर्ष समितिया न्ह्यलुवा नापं महानगरपालिकाया राजनीतिक संयन्त्रया प्रतिनिधितय्सं नं ब्वति काःगु उगु भेलां नरेन्द्रराज श्रेष्ठया नेतृत्वय् उगु गुथि नीस्वंगु खः ।
गुथिया न्वकुपिं इन्द्रमानसिं सुवाल व राज्यप्रकाश प्रधानाङ, छ्याञ्जेय् धर्म मुनिकार, ल्यूछ्याञ्जेय् ज्ञानेन्द्ररत्न बज्राचार्य, दांभरिइ दशनारायण महर्जन, लिउ दांभरिइ नानिशोभा डंगोल च्वनादीगु दु। झिंन्हय्म्हेसिया गुथिया दुजलय् पटना डंगोल, सुरज शाक्य, नरेन्द्रविलास बज्राचार्य, मचाबाबु मालाकार, बाबुराजा महर्जन, देवरत्न महर्जन, श्रीकृष्ण महर्जन, रोशनमान शाक्य, बाबुकाजी पुजारी व सानुकाजी पोडेयात ल्यःगु दु ।
अथे हे आः याकनं किपू नगरपालिकाय् नं नेवाः कर्मचारीतय्गु गुथि दयेकेगु तयारी जुयाच्वंगु खँ नेवाः स्वायत्त राज्य मंकाः परिषद किपुलिं धाःगु दु।
थ्वहे झ्वलय् म्हिगः शानिवाः किपू नगरपालिकाया बजेट नेवाः स्वायत्त राज्यया अवधारणा कथं तयार याके बीगु निंतिं किपूया राजनीतिक दलया प्रतिनिधि, थीथी ख्यःया न्ह्यलुवा, सामाजिक संस्थाया प्रतिनिधितलिसे सहलह ब्याकेगु ज्या जुल ।
