न्हापांम्ह मिसा उपसभामुख श्रेष्ठ मंत
येँ (सन्ध्या टाइम्स)/नेपाःया न्हापांम्ह उपसभामुख लीला श्रेष्ठ सुब्बा ६३ दँय् थौं सुथय् मंत। धरानय् च्वंगु थःगु हे छेँय् वय्कः मदुगु खः ।
ताप्लेजुङया सिगैचा गाविस वडा नं. ९ या साम्मागु धइगु थासय् जन्म जूम्ह सुब्बा ताः ई न्ह्यवंनिसें म्हं मफयाच्वंम्ह खः। नेपाली कम्युनिष्ट आन्दोलनय् विद्यार्थीकालंनिसें क्रियाशील जुयादीम्ह वय्कः २०१५ सालया आम चुनावय् सुनसरी क्षेत्र नं. १ पाखें त्याःगु खःसा लिपा २०५५ साल तक न्हापांम्ह मिसाम्ह उपसभामुख जुयाः ज्या यानादीगु खः। प्यंगू दशक न्ह्यः वय्कलं धरानया धुरवकुमार श्रेष्ठलिसे इहिपा यानादीगु खः। वय्कःपिनि मस्त धाःसा मदु। लिपांगु इलय् तक नं वय्कः नेकपा (एमाले)या सक्रिय कार्यकर्ताया रुपय् ज्या यानादीगु खः।
