स्वंगू दलया बैठक बिना निष्कर्ष
येँ (सन्ध्या टाइम्स)/संविधानसभाया ततःधंगु स्वंगू दल एकीकृत माओवादी, नेपाली कांग्रेस व एमालेया शीर्ष नेतातय्गु बैठक थौं नं बिना निष्कर्ष क्वचाल ।
सिंहदरवारय् च्वंगु माओवादी संसदीय दलया ज्याकुथी स्वंगू दलया उगु बैठक च्वंगु खः। बैठकय् थःपिंसं म्हिगः सार्वजनिक यानागु संविधान निर्माण यायेगु व सेना समायोजन यायेगु निंतिं तयार याःगु प्रस्ताव तःगु खःसा उकियात कांग्रेस व एमालेया नेतातय्सं तप्यंक हे अस्वीकार यायेवं स्वंगू दलया बैठक बिना निष्कर्ष क्वचाःगु खः। स्वंगू दलया शीर्ष नेतातय्गु मेगु बैठक कन्हय् च्वनी धाःगु दु ।
राष्ट्रपति डा. रामवरण यादवं राष्ट्रिय सहमतिया सरकार दयेकेगु निंतिं थप याःगु न्यान्हुया म्याद कन्हय् फुइत्यंगु दु। कन्हय् तकया दुने नं राष्ट्रिय सहमतिया सरकार दयेके मफुत धाःसा संविधान कथं बहुमतीय प्रणालीइ वनेमालीगु बाध्यता जुइ ।
