गल्ती याइपिं सरकारं पिहांवनी : खनाल
सत्ता साझेदार नेकपा एमालेया अध्यक्ष झलनाथ खनालं सरकारय् च्वना गल्तीयाइपिं सरकारं पिहांवनीगु खँ धयादीगु दु । एमालें छुं गल्ती मयागुलिं सरकारं पिहांवनीगु खँ मदु धासें बरु सरकारय् च्वना गल्तीयाइपिं हे पिहांवनी धयादिल ।
बुधवाः प्रेस चौतारी कस्कीं पोखराय् याःगु पत्रकार भेटघाट ज्याझ्वलय् अध्यक्ष खनालं धयादिल - 'सरकारय् च्वना एमालें छुं नं गल्ती मयाःगुलिं पिहांवनेमाःगु आवश्यकता मदु ।' वयेकलं धयादिल - 'सुनां गल्तीयाइ वहे पिंहावनी ।'
सरकारया नेतृत्व यासें हत्या, हिंसा न्ह्याकातुं च्वंगुलिं वयेकलं माओवादी नेतृत्वयात सुधार यायेत इनाप यानादिल । खनालं माओवादीया अराजक व अपराधिक गतिविधि विरुद्ध सचेत जुया संघर्ष यायेमा धयादिल । माओवादीं अपराध ल्वाभ व शक्तिया भरय् जनतायात ख्यायेत स्वःगु धासें खनालं आः अज्याःगु खँ एमालें सहःयाइमखु धयादिल ।
बुटवलय् हत्यायाम्ह एमाले कार्यकर्ता प्रचण्ड थैवया हत्यारायात माओवादीं संरक्षण याःगु खनालं द्वपं बियादिल । प्रधानमन्त्रीं थैवया हत्यारायात ज्वनेगु आश्वासन ब्यूगुलिं थःपिं उगु ई पियाच्वना:गु खँ कनादिल ।
अथेहे खनालं न्याक्वःगु राष्ट्रिय खेलकुद धेंधेंबल्लाय् माओवादीया जनमुक्ति सेनायात दुथ्याका अनावश्क विवाद सृजना याःगु खँ धयादिल ।
