क्याम्पस प्रमुखयात आक्रमण
येँ (सन्ध्या टाइम्स)/गोरखाया घ्याम्पेसालस्थित दुल्लभ उच्चमाविया प्रमुखयात स्थानीय माओवादी कार्यकर्तातय्सं आक्रमण यानाः घाःपाः याना बिउगु दु ।
छुं न्हि न्ह्यः उगु उच्च माविया व्यवस्थाप समितिया चुनाव जूबलय् माओवादी व कांग्रेस दथुइ ल्वापु जुयाः अन च्वंपिं शिक्षकत हे येँय् बिसिउँ वयेमाःगु खः। वहे झ्वलय् उच्च माविया प्रमुख गोविन्द प्रसाद भट्ट नं गां त्वःताः विस्थापित जुयाच्वंम्ह खः। तर उकुन्हु माओवादी व कांग्रेसया स्थानीय नेतातय् बैठक च्वनाः छम्हं मेम्हेसिया कार्यकर्तायात आक्रमण मयायेगु धकाः सहमति जूगु खः। उगु सहमति जुइवं आः गां लिहां वंसां जिल धकाः क्याम्पस प्रमुख भट्ट थःगु गां लिहां वयाच्वंम्ह जुयाच्वन। स्थानीय टलक गुरुङ्गलिसें मोटरसाइकल गयाः छेँय् वयाच्वंम्ह क्याम्पस प्रमुख भट्टयात गोर्खाया सतेपिपल धाःगु थासय् थ्यनेवं छपुचः माओवादी समर्थित वाईसीएल कार्यकर्तातय्सं साइकलया चेनं दायाः आक्रमण याःगु खँ धाःगु दु। उकी लानाः क्याम्पस प्रमुख भट्ट घाःपाः जूगु दुसा माओवादी कार्यकर्तातय्सं वय्कःया मोटरसाइकल नं तोडफोड याना बिउगु खँ धाःगु दु ।
कांग्रेस सूत्रं धाः कथं वंगु असार २३ गते तिनि माओवादीया जिल्ला इन्चार्ज कृष्ण धिताल व कांग्रेसया जिल्ला सभापति चिनकाजी श्रेष्ठपिंसं हस्ताक्षर यानाः आः माओवादी व कांग्रेस दथुइ आक्रमण मयायेगु धकाः सहमति कायम याःगु खः। माओवादीं उगु सहमति पालना मयाःगु द्वपं कांग्रेसं बिउगु दु ।
