ज्याकुथी मञ्चया ताःफ्वः
येँ (सन्ध्या टाइम्स)/विवादय् लानाच्वंगु संघीय लोकतान्त्रिक राष्ट्रिय मञ्चया निगू गुट मध्ये आः आधिकारिक मान्यता प्राप्त कुमार लिङ्देन पुचलं मञ्चया संघीय ज्याकू थःपिनि कब्जाय् कयाः अन तालं ग्वया बिउगु दु। थ्व मञ्च दुने थारू आन्दोलनया न्ह्यलुवा लक्ष्मण थारू गुट व कुमार लिङ्देन गुट दथुइ कचवं जुयाः निगुलिं गुटं संस्थाय् दावी यानाच्वंगु खःसां उकुन्हु निर्वाचन आयोगं कुमार गुटयात मान्यता बीवं थ्व गुटपाखें अनामनगरय् च्वंगु मञ्चया ज्याकुथी तालं ग्वया बिउगु खः ।
विवाद लिपा उगु ज्याकू लक्ष्मण थारू गुटं सञ्चालन यानाच्वंगु खः। उमिसं 'संघीय लोकतान्त्रिक राष्ट्रिय मञ्च' यात नं 'पार्टी' धइगु साइन बोर्ड तयातःगु खः। अथे खःसां वंगु वालय् आधिकारिक मान्यता प्राप्त कुमार लिङ्देन पुचःया कार्यकर्ता व प्रहरी समेत वनाः उगु ज्याकुथी तालं ग्वया बिउगु खः ।
मञ्चया ज्याकुथी तालं ग्वया बीवं आः लक्ष्मण थारू गुटं कुमार पुचःया नेतातय्त ज्यान कायेगु ख्याच्वः बियाच्वंगु खँ सीदुगु दु। मञ्चं धाःसा ज्याकू कब्जा लिपा थ्व विवादया छगू अध्याय क्वचाःगु दु धाःगु दु। जातीय आधारय् संघ निर्माण यायेमाः धइगु बिचाःया थ्व मञ्चपाखें नं संविधानसभाय् छम्ह दुजः दु ।
