एमालें माओवादी विरुद्ध भण्डाफोर याइगु
नेकपा (एमालें) एनेकपा (माओवादी)या भण्डाफोर यायेगु निर्णय याःगु दु । एमालेया ओखलढुंगाया नेता छवि कार्कीया हत्याया विरोधय् एमालें माओवादीया भण्डाफोर यायेगु ज्याझ्वः सार्वजनिक याःगु दु ।
आइतवाः पार्टीया मू ज्याकूथीइ छगू पत्रकार सम्मेलन यानाः एमालें भण्डाफोर ज्याझ्वःया बारे जानकारी ब्यूगु खः । पत्रकार सम्मेलनय् पार्टी अध्यक्ष खनालं माओवादीया थंज्याःगु व्यवहार विरुढ भण्डाफोर यायेगु धयादिल ।
ज्याझ्वः कथं असार २८ गते निसें साउन ३ गते तक जनवर्गीय संगठनं केन्द्र व जिल्लास्तरय् विरोध सभा, धर्ना व जुलुस प्रदर्शन याइगु जूगु दु । अथेहे कार्की मदुगु झिंस्वन्हुया पुण्यतिथि कुन्हु जिल्ला सदरमुकामय् ज्याझ्वः यायेगु व उकी पार्टी अध्यक्ष झलनाथ खनाल, पार्टीया वरिष्ठ नेता नापं प्रधानमन्त्री माधवकुमार नेपाल लगायत शीर्ष नेतातय्सं ब्वति कायेगु निर्णय याःगु दु ।
वंगु बिहीवाः बहनी ओखलढुंगाय् अज्ञात पुचलं कार्कीया हत्या याःगु खः । एमालें उकी माओवादीया ल्हाः दुगु दावी यानाच्वंगु दुसाः माओवादीं उकी थःपिनिगु ल्हाः मदुगु खँ धयाच्वंगु दु ।
