एमाले व कांग्रेसं सदन बहिष्कार
बुटवलय् हत्या जुम्ह एमाले समर्थीत युथ फोस्रया नेता प्रचण्ड थैवया हत्यारायात गिरफ्तार मयाःगु विरोधय्
नेकपा एमालें व्यवस्थापिका संसद्या मंगवलाःया बैठक बहिस्कार याःगु दु ।
थैवया हत्यारायात मज्वंतल्ले सदन बहिष्कार यायेगु धासें एमालेया सचेतक भीम आचार्यं पार्टीया पाखें सदन बहिष्कारया घोषणा यानाः पिहांवंगु खः । थ्वस्वयां न्ह्यः सभासद्तय्सं हत्यारायात प्रधानमन्त्रीया ज्याकूथीं हे संरक्षण बियातःगु धासॆं आलोचना याःगु खः । निर्धारित ई स्वयां निघौ च्वंगु बैठकय् न्ववापिंसं सत्ता नेतृत्व यानाच्वंगु दलया कारणं हे हत्या, हिंसा लगायतया अराजक ज्याखँ त अप्वया वनाच्वंगु धासें सरकारया विरोध याःगु खः ।
एमालेया सभासद्तय्सं सदन बहिष्कार याना पिहांवनेवं कांग्रेसं नं सदन बहिष्कार याःगु खः । सदन बहिष्कारया कारणं मंगलवाः नं कार्यसूची दुहांय् मवंसें बुधवाःतकःया निंतिं बैठक स्थगित याःगु दु ।
