माओवादी प्रस्ताव कांग्रेस-एमालेयात अस्वीकार
एकीकृत नेकपा (माओवादीं) शनिवा: सार्वजनिक या:गु 'राजनीतिक गतिरोध अन्त्यया निंतिं सहमतिया आधार' नामक प्रस्तावयात नेपाली कांग्रेस व नेकपा (एमालें) अस्वीकार याःगु दु । सेना समायोजन व व्यवस्थापनया कार्यतालिका सहित न्ह्यब्वगु प्रस्ताव बृहत शान्ति सम्झौता विपरित जूगु धासें कांग्रेस व एमालें थुकीयात स्वीकार यायेमफइगु खँ धाःगु दु ।
आइतवाः माओवादी संसदीय दलया ज्याकूथीइ जूगु प्रमुख स्वंगू दलया बैठकय् निगू दलं थुगु प्रस्तावं सहमतिय राजनीतियात न्ह्यने न्ह्याकेमफइगु बिचा: प्वंकूगु दु । निगू दलया नेतातय्सं माओवादी प्रस्ताव अस्पष्ट जूगु खँ धाःगु दु ।
कांग्रेस नेता डा. रामशरण महतं माओवादीं हःगु प्रस्ताव बृहत शान्ति सम्झौता विपरित जूगु व पुलांगु सहमति सम्झौताया मर्म कथं मजूगु धयादिल । एमाले प्रचार प्रसार विभागया प्रमुख प्रदिप ज्ञवालीं माओवादीं न्ह्यब्वगु प्रस्ताव न्हापा जूगु सहमति स्वयां ल्यूने वंगु धयादिल ।
माओवादी उपाध्यक्ष नारायणकाजी श्रेष्ठ 'प्रकाशं' धाःसा कांग्रेस व एमाले सहमतिय सरकारया पक्षय् मदुगु द्वपं बियादिसें निगू दलं सहमति यायेत पंग थनाच्वंगु धयादिल । वय्कलं माओवादीं न्ह्यब्वगु प्रस्तावया बारे थप सहलह याना परिमार्जन यायेफइगु कनादिल ।
माओवादीं न्ह्यब्वगु प्रस्तावया बारे कांग्रेस व एमालें थःथःगु पार्टी दुने सहलह यानाः हानं स्वंगू दलया बैठक च्वनीगु जूगु दु ।
