हत्यारायात कारवाही जुइ : प्रम
प्रधानमन्त्री माधवकुमार नेपालं नेकपा (एमाले)या ओखलढुंगाया जिल्ला नेता व केन्द्रीय प्रतिनिधि परिषदया दुजः छवि कार्कीया हत्यारायात कारवाही यायेगु प्रतिबद्धता प्वंकादीगु दु ।
मदुम्ह कार्कीयात शनिवाः खुलामञ्चय् वनाः श्रद्धाञ्जली देछानादिसें वय्कलं हत्या जघन्य शैलीलय् जूगु बर्बर अपराध जूगु धयादिसें न्ह्यागु नं आवरणय् जुसां हत्यारायात सरकारं मत्वःतिगु धयादिल । वय्कलं हत्याया घटनाक्रम व तथ्यं उकी माओवादीया संलग्नता खनेदुगु द्वपं नं बियादिल ।
अथेहे एमाले अध्यक्ष झलनाथ खनालं कार्कीया हत्या नियोजित रुपं जूगु धयादिसें दोषीयात तत्काल ज्वना कडा कारवाही यायेत सरकार नाप माग यानादिल । कार्की ओखलढुंगाया लोकप्रिय नेता जूगुलिं हत्या जूगु धयादिसें खनालं हत्यारायात ज्वनेत माओवादीं नं ग्वाहालि यायेमाःगु धयादिल ।
कार्कीया सिम्ह शनिवाः ओखलढुंगां येँय् हःगु खःसा अन्तिम श्रद्धाञ्जलीया निंतिं येँया खुलामञ्चय् तःगु खः । वय्कयात अन्तिम श्रदाञ्जली देछायेत प्रधानमन्त्री नेपाल, एमाले अध्यक्ष खनाल, सभामुख सुवासचन्द्र नेम्वाङ, एमाले उपाध्यक्ष वामदेव गौतम, महासचिव ईश्वर पोखरेल, वरिष्ठ नेता केपी शर्मा ओली, रक्षा मन्त्री विद्या भण्डारी लगायत नेतात खुलामञ्च थ्यंकादीगु खः ।
अन्मित श्रदाञ्जली लिपा शनिवाः हे कार्कीया पशुपति आर्यघाटय् दाहसंस्कार याःगु खः ।
