माओवादीं सेना समायोजनया प्रस्ताव न्ह्यब्वल
* निलाया दुने समायोजन व पुनःस्थापन जुइगु लडाकुतय् ल्याः निर्धारण
* वया लच्छि लिपा समायोजन व पुन:स्थापना
* समायोजन व संविधान निर्माण नापनापं
* चैत दुने संविधान निर्माण
एकीकृत नेकपा (माओवादीं) राजनीतिक गतिरोध अन्त्य यायेत तयार याःगु सेना समायोजन सम्बन्धी कार्यतालिका सार्वजनिक याःगु दु ।
शनिवाः पार्टी मुख्यालय कोटेश्वर पेरिस डाँडाय् छगू पत्रकार सम्मेलन यानाः उगु प्रस्ताव सार्वजनिक याःगु खः । थौं च्वनीगु धाःगु स्वंगू प्रमुख दलया बैठकय् सार्वजनिक यायेगु ग्वसाः दुगु खःसां स्वंगू दलया बैठक स्थगित जुइवं माओवादीं पत्रकार सम्मेलन यानाः प्रस्ताव सार्वजानिक याःगु खः ।
'राजनीतिक गतिरोध अन्त्याया निंतिं सहतिया आधार' नामक माओवादी प्रस्तावय् माओवादी सेना समायोजन व पुनःस्थापना लगायत राजनीतिक गतिरोधया खाका दुथ्याःकातःगु दु । प्रस्तावय् तत्काल लडाकुतय्त माओवादी सेनाया लडाकु रेखदेख, समायोजन व पुनःस्थापना विशेष समिति अर्न्तगत ह्येगु खँ न्ह्यथनातःगु दु ।
समिति अर्न्तगत ह्येधुंकाः विशेष समितिं प्रत्येक शिविरया लडाकुत नाप प्रत्यक्ष नापलाना व्यक्तिगत इच्छा थुइकेगु व उकीया हे अधारय् समायोजनय् वनेगु व पुनःस्थापनाय् वनेगु लडाकुतय् ल्या निलाया दुने क्वःछीगु खँ धाःगु दु ।
समायोजन व व्यवस्थापनय् वनीपिंत निगू शिविरय् छुटे यायेधुंकाः लच्छिया दुने लडाकुतय्त थीथी सुरक्षा निकायलय् समायोजन यायेगु खँ कार्यतालिकाय् न्ह्यथनातःगु दु । समायोजनया निंतिं धाःसा सुरक्षा निकायया भर्ना मापदण्ड स्वयां समायोजनया विश्व मान्यता प्राप्त मापदण्डयात अंगिकार यायेगु खँ धयातःगु दु ।
संविधान निर्माण प्रकृया व माओवादी लडाकु समायोजन व पुनःस्थापना नापनापं यकेमाःगु खँ बः ब्यूसें माओवादीं शान्ति प्रकृया क्वमचातल्ले संयुक्त राष्ट्रसंघीय मिसन अनमिनया भूमिका आवश्यक जूगुलिं अनमिनया म्याद थप यायेत प्रस्ताव याःगु दु ।
माओवादीं सशस्त्र युद्धय् घाःपाः जूपिंत वासः याकेगु व्यवस्था यायेमाःगु, वाइसीएलया अर्धसैन्य संरचना चीकेगु व दक्वं शहिदया छेँजःयात १० लख तका दरं राहत बीगु खँ धाःगु दु । अथेहे बृहत शान्ति सम्झौताय् न्ह्यथनात कथं थीथी आयोग गठन यायेगु व चैत दुने न्हूगु संविधान दयेकेगु खँ प्रस्तावय् न्ह्थनातःगु दु ।
