एमाले सहमतिय सरकारया पक्षय्
नेकपा (एमालें) आः गठन जुइगु न्हूगु सरकार राजनीतिक दलत दथुइ सहमतिया आधारय् हे जुइमाःगु खँय् बः ब्यूगु दु । शनिवाः एमालेया मू ज्याकू मदन नगर बल्खुइ च्वंगु स्थायी समितिया बैठकं बहुमतिय आधारय् गठन जूगु सरकार पूर्ण रुपं असफल जुइधुंकूगुलिं आः हानं बहुमतिय सरकार गठन यायेगुया अर्थ मदइगु खँ धाःगु दु ।
न्हूगु सरकारया प्राथमिकता शान्ति प्रकृया व संविधान निर्माण जुइमाःगु व अज्याःगु लक्ष्य प्राप्तिया निंतिं सहमतिय सरकार बिना असम्भव जूगुलिं सहमतिय सरकारया विकल्प मदुगु खँ एमालें धाःगु दु । एमालें बहुमतिय सरकार गठन यायेत मस्वसें सहमतिय सरकार गठन यानाः देय्यात राजनीतिक निकास बिमाःगु खँय् बः ब्यूगु दु ।
अथेहे बैठकं असार २४ गते पार्टीया ओखलढुंगया नेता छवि कार्कीया हत्या प्रति दुःख प्वंकूसें हत्याया निन्दा व भर्त्सना याःगु दु । एमालें हत्याय् माओवादीया संलग्नता दुगु द्वपं ब्यूसें हत्यारायात अविलम्ब ज्वना कडा काववाही यायेत सरकार नाप माग याःगु दु ।
