मनपाय् मंकाः संघर्ष समितिं आन्दोलन याइगु
येँ (सन्ध्या टाइम्स)/येँ महानगरपालिकाय् नेवाः स्वायत्त राज्यया अवधारणा कथं ज्या न्ह्याकेत दबाव बीगु निंतिं नेवाः स्वायत्त राज्य मंकाः संघर्ष समितिं दवावमुलक ज्याझ्वः याइगु जूगु दु ।
न्हूगु राजनीतिक अवस्था ब्वलने धुंकूगु इलय् महानगरपालिकां कर्मचारी भर्ना कायेगु निंतिं पुलांगु व्यवस्था कथं प्रक्रिया न्ह्याकूगु रद्द यानाः न्हूकथं प्रक्रिया न्ह्याकेमाःगु, महानगरपालिकाय् नेवाः डेस्क स्थापना यायेमाःगु, मनपाया बजेट तयार यायेगु इलय् नेवाः भाय्, लिपि, संस्कृति संरक्षण सर्म्वद्धन व विकासया नितिं माःगु कथं ध्यबा फ्यायेमाःगु, महानगरपालिकां क्वःछिउगु खँ, सुचं नापं विज्ञापन नेवाः भासं नं पित बीमाःगु, नेवाः लिपिं साइन बोर्ड तयेकेगु नितिं विशेष ब्यवस्था यानाः नेवाः लिपि प्रयोग याःपिंत करय् विशेष छुट बीमाःगु नापं थीथी खँत दुथ्याकाः मागपत्र सहित वइगु असार २८ गते मनपाय् ज्ञापनपत्र बीगु जूगु दु ।
थःपिनिगु मागयात बेवास्ता यात धाःसा वइगु साउन २ गतेनिसें हे दबाबमुलक आन्दोलन यायेगु धकाः मंकाः संघर्ष समितिं तयार याःगु दु ।
किपुली बजेट तयारी
नेवाः स्वायत्त राज्य मंकाः परिषद् किपूपाखें किपुली नेवाः स्वायत्त राज्यया अवधारणा कथं किपू नगरपालिकय् बजेट दयेके बीगु तयारी याःगु दु। थ्वहे झ्वलय् कन्हय् मंकाः परिषद्या ग्वसालय् परिषदया दुजः, सल्लाहकार नापं किपूया थीथी ख्यःया न्ह्यलुवात लिसे वृहत् सहलह मुँज्या याइगु जूगु दु। बजेटया बारे दलया प्रतिनिधितलिसे नं सहलह जुयाच्वंगु दु धकाः परिषदं धाःगु दु ।
थौं नेवाः कर्मचारीतय्गु गुथि दयेकीगु
मनपाया नेवाः कर्मचारीतय्गु थौं छगू भेलाया दथुइ नेवाः ज्यासनामि गुथि नीस्वनीगु जूगु दु। नेवाः राज्यया अवधारणा कथं मनपाय् ज्या याके बीगु निंतिं माःगु कथं भूमिका म्हितेत उगु कथं गुथि नीस्वनेत्यंगु खः। थौंया भेलाय् मंकाः संघर्ष समितिया प्रतिनिधि नापं महानगरपालिकाया संयन्त्रय् दुथ्याःपिं दलया प्रतिनिधितय्सं नं ब्वति काइ धाःगु दु ।
