एमाले अंचल दुजःया हत्या
येँ (सन्ध्या टाइम्स)/नेकपा (एमाले)या सगरमाथा अंचलया दुजःयात अज्ञात मनूतय्सं स्याना बिउगु दु।
एमालेया स्थानीय नेता छबी कार्कीयात वंगु चान्हय् आक्रमण यानाः स्याना बिउगु खः ।
म्हमसिउपिं मनूतय्सं आक्रमण यानाः घाःपाः जूम्ह एमाले नेता कार्कीयात वासः यायेत अनया मिसन अस्पतालपाखे यंकूगु खःसां लँय् हे मदुगु खँ प्रहरीं धाःगु दु। स्वम्ह प्यम्ह ति वःपिं मनूतय्सं वय्कःयात आक्रमण याःगु खँ स्थानीय मनूतय्सं धाःगु दु ।
स्थानीय नेता कार्कीयात सुनां व छाय् आक्रमण यात धकाः सीके मफुनिसा उगु घटनायात कयाः प्रहरीं अनुसन्धान यानाच्वंगु दु ।
थ्वहे दथुइ येँया वनस्थलिइ च्वंगु राधेश्याम स्वीट हाउसय् अथे हे झिंन्यादँ ति दुम्ह छम्ह मचा सिनच्वंगु अवस्थाय् लूगु दु। सीम्ह मचा सिन्धुपाल्चोकया सविन श्रेष्ठ खः धाःगु दु। मचा सीगुया कारण सी मदुनिसा प्रहरीं अनुसन्धान न्ह्याकाच्वंगु दु ।
