'सहमतीय मखु समावेशी सरकार'

येँ (सन्ध्या टाइम्स)/एकीकृत माओवादीया पोलिटब्यूरो दुजः सोनाम लामां आःया अवस्थाय् समावेशी लोकतान्त्रिक सरकार दयेकेमाः धयादीगु दु। वय्कलं आःया संक्रमणकालिन अवस्थाया एजेन्डा धइगु हे शान्ति व संविधान खः धासें संविधानसभाय् दुथ्याःगु फुक्क दलयात हे निर्णय यायेगु थासय् तयाः सरकारय् वयेत तयार जूगु पार्टीयात समानुपातिक प्रतिनिधित्व जुइ कथं समावेशी लोकतान्त्रिक सरकार दयेकेमाः धयादिल ।

'सन्ध्या टाइम्स'लिसे खँ ल्हासें वय्कलं थौंकन्हय् राष्ट्रिय सहमतिया सरकार दयेकेगु धकाः दलया नेतात न्ह्याः वनाच्वंगु लँपु त्वःताः आः समावेशी सरकारया लँपु ज्वनेमाःगु सुझाव नं वय्कलं बियादिल। आः समावेशी सरकारया मंकाः ज्याझ्वः ज्वनाः संविधान तयार मजूतले मंकाः कथं हे न्ह्याः वनेमाःगु व संविधान निर्माण लिपा नं उकियात निरन्तरता बीमाः धयादीगु दु। वय्कःया कथं माओवादीं संयुक्त राष्ट्रिय सरकार धयाच्वंगु हे समावेशी सरकार खः ।