परियत्ति कक्षा ताःलाःपिंत सिरपाः
येँ (सन्ध्या टाइम्स)/धम्मवती गुरुमांया सभापतित्वय् जूगु छगू ज्याझ्वःया दथुइ लुम्बिनी बौद्ध विश्वविद्यालयया उपकुलपति प्रा.डा. त्रिरत्न मानन्धरं परियत्ति शिक्षाय् पास जूपिं धर्मकीर्ति विहार बौद्ध परियत्ति केन्द्रया परीक्षार्थीतय्त सिरपाः इनादिल ।
ज्याझ्वलय् लुम्बिनी बौद्ध विश्वविद्यालयया उपकुलपति जुयादीगु लसताय् धर्मकीर्ति विहारपाखें धम्मवती गुरुमांनं डा.मानन्धरयात नं हनेगु ज्या जूगु खः ।
कोण्डन्य भन्तेपाखें शील प्रदान यानाः न्ह्याःगु उगु ज्याझ्वलय् डा. सुमनकमल तुलाधरं लसकुस यानादीगु खःसा चमेली गुरुमांनं प्रतिवेदन न्यंकाबिज्यात ।
थुगुसीया परीक्षाय् धर्मकीर्ति केन्द्रपाखें न्यय्म्ह पास जूगु दुसा झिगूगु कक्षाय् ताःलानाः त्यागवति गुरुमां व प्रेमलता तुलाधर परियत्ति सद्धम्म कोविद जुयादीगु खः। ज्याझ्वलय् ]कोविद' जुयादीपिंत श्री प्रत्येकमान-जगतशोभा स्मृति सिरपाः नापं धम्मवती गुरुमांनं द्वःछि तका व पंचवीरसिं सिरपाःपाखें पंचवीरसिं तुलाधरं द्वःछि तका दां नं लःल्हानादीगु खः ।
नुगःखँ कनेगु झ्वलय् नेपाल बौद्ध परियत्ति शिक्षा परिषदया सचिव तथा सहपरिक्षा नियन्त्रक निग्रोध भन्ते व मू पाहां डा. त्रिरत्न मानन्धरं परियत्ति शिक्षायात गुकथं व्यापक याना यंकेगु व गुकथं एकेडेमिक डिग्रीइ दुथ्याकेगु धइगु विषयय कुलाबिज्यात। धर्मकीर्ति विहारय् परियत्ति ब्वंकीपिं गुरुमांपिंत दानप्रदान नं जूगु उगु ज्याझ्वलय् शुभवती गुरुमां नं सुभाय् देछानाबिज्याःगु खः ।
