संविधान निर्माण यायेत जनजातितय् दबावमुलक आन्दोलन
नेपाल आदिवासी जनजाति महासंघं न्हूगु संविधान निर्माण यायेत राजनीतिक दलतय्त दबाव बीत आन्दोलन यायेगु घोषणा याःगु दु । जनजाति महासंघं संविधान निर्माण यायेगु ज्याय् राजनीतिक दलत उदासिन जूगु धासें १ महिना ताःहाकगु आन्दोलनया ज्याझ्वः घोषणा याःगु दु ।
चितवनया सौराहालय् बिहीवाः क्वचाःगु महासंघया जिल्लास्तरीय बैठकं थ्वहे साउन २ गते निसें दबावमुलक आन्दोलन यायेगु निर्णय याःगु दु । स्वन्हुन्यंकया राष्ट्रिय भेलां तत्काल संविधान निर्माणया कार्यतालिका सार्वजनिक यानाः राजनीतिक दलतय्त संविधान निर्माणया ज्याय् केन्द्रीत जुइत इनाप नं याःगु दु ।
साउन २ गते निसें ३० गते तक चरणवद्ध आन्दोलनया ज्याझ्व: घोषणा या:गु महासंघं साउन २ गते निसें २४ गते तक राजनीतिक दलया नेता व देय्या जिल्ला प्रशासनय् ज्ञापनपत्र ल:ल्हायेगु, जिल्ला जिल्लाय् भेला व प्रशिक्षण बीगु जूगु दु । अथेहे साउन २९ गते सनिलय् देय्यंक मशाल जुलुस यायेगु व ३० गते राजधानी नाकाबन्दी यायेगु ज्याझ्व: घोषणा या:गु दु ।
६५ जिल्लाया प्रतिनिधितय् ब्वति दुगु राष्ट्रिय भेलां थीथी २० बुँदे सौराहा घोषणा पत्र नं जारी याःगु दु ।
