सेना समायोजनया कार्यतालिका ह्येगु माओवादी तयारी
एकीकृत नेकपा (माओवादीं) सेना समायोजनया बारे कार्यतालिका हयाः थःगु नेतृत्वया राष्ट्रिय सरकार गठन यायेगु तयारी शुरु याःगु दु । नेपाली कांग्रेस व नेकपा (एमाले) लगायत दलतय्सं माओवादीं सेना समायोजनया बारे स्पष्ट कार्यतालिका सार्वजनिक मयाकं वया नेतृत्वया सरकार स्वीकार यायेमफइगु धकाः दबाव बीवं माओवादीं कार्यतालिका ह्येगु तयारी शुरु या:गु ख: ।
सेना समायोजनया बारे कार्यतालिका ह्येत शुक्रवा: बहनी माओवादीया पादाधिकारीतय् बैठक च्वनाच्वंगु दुसाः थुकी समायोजनया खुगू बुँदे कार्यतालिका तयार यायेगु बारे सहलह जुयाच्वंगु खँ धाःगु दु । पदाधिकारीतय्सं तयार याःगु कार्यतालिकाया बारे थौं हे माओवादी संसदीय दलया बैठक नं च्वना उकीया बारे सहलह याइगु ज्याझ्वः दु ।
न्हूगु सरकार गठनया बारे बिहीवाः मधेशवादी दलत दथुइ जूगु खँल्हाबंलाय् मधेशवादी दलतय्सं यदि माओवादीं सेना समायोजनया बारे कार्यतालिका सार्वजनिक याःसा वया नेतृत्वया सरकारयात समर्थन यायेफइगु खँ धाःगु खः ।
माओवादीं धाःसा सरकार नेतृत्वया निंतिं जक मखसें शान्ति प्रकृयायात निष्कर्षय् थ्यंकेत थःपिंसं सेना समायोजनया कार्यतालिका दयेकेगु तयारी यानाच्वंगु खँ धाःगु दु ।
