एमालें नं प्रधानमन्त्रीया निंतिं दावी याइगु संकेत
नेकपा (एमाले)या वरिष्ठ नेता माधवकुमार नेपालं प्रधानमन्त्री पदं राजीनामा बीधुंकाः न्हूगु राष्ट्रिय सरकार गठनया निंतिं कुतः जुयाच्वंगु इलय् उगु सरकारया नेतृत्वय् हानं एमालें दावी याइगु संकेत खनेदुगु दु ।
न्हूगु सरकार गठनया बारे बिहीवाः मधेशवादी दलत दथुइ जूगु खँल्हाबंलाय् एमाले अध्यक्ष झलनाथ खनालं उगु संकेत क्यनादीगु खः । बैठकय् अध्यक्ष खनालं लडाकु व ल्वाभः पाखें अलग मयायेकं माओवादीया नेतृत्व स्वीकार यायेमफइगु खँ न्ह्यथनादिसें दक्वसियां सहमति दुसाः एमाले सरकारया नेतृत्व यायेत तयार जूगु खँ धयादीगु खः ।
न्हूगु सरकारया नेतृत्वय् दाबी मयायेत थःगु हे पार्टी दुने पाखें दबाव लानाच्वंगु इलय् एमालें सरकारया नेतृत्व यायेत तयार जूगु खँ धाःगु दु । तर बैठकय् एमालें प्रधानमन्त्री पदया निंतिं दावी हे मयासां माओवादीयात सरकारया नेतृत्व बीफइगु अवस्था मदुगुलिं नेतृत्व यायेत एमाले तयार जूगु खँ धाःगु खः ।
