भन्सार प्रकरण बारे छानबिन याइगु
येँ (सन्ध्या टाइम्स)/मोरङ्गया सीडीओ शशिशेखर श्रेष्ठं विराटनगर भन्सारया प्रमुख मानबहादुर पौडेल लगायत मेपिं स्वम्ह अधिकृततय्त चान्हय् प्रहरीं ज्वंकाः बयान काःगु खँयात कयाः जूगु विरोध स्वरुप देय्या फुक्क हे भन्सार कार्यालय बन्द जुइवं अर्थ मन्त्रालय व गृह मन्त्रालयं थ्व घटनाय् छानबिन याइगु जूगु दु ।
सीडीओ श्रेष्ठं म्हीग चान्हय् विराटनगर भन्सारया अधिकृत लगायत मेपिं पदाधिकारीतय् छेँय् छेँय् प्रहरी छ्वयाः उमिके बयान काःगु खः। प्रशासन सम्बन्धी छगू मुद्दाय् भन्सारया थ्व अधिकारीतय्सं थःपिनि विरुद्ध बयान बिउगु कारणं थः मुद्दाय् बुइमाल धकाः सीडीओ श्रेष्ठं उमित चान्हय् हे सःताः बयान काःगु खँ भन्सारया अधिकारीतय्सं धाःगु दु ।
थुकिया विरुद्ध विराटनगरया भन्सार म्हीगंनिसें हे बन्द जुयाच्वंगु खःसा उकियात समर्थन यासें देय्या मेमेगु भन्सार कार्यालय नं बन्द जूगु खः। लिसें भन्सार ज्याकुथी ज्या याइपिं मजदूर युनियनतय्सं तकं थुकिया समर्थनय् ज्या बन्द यायेवं भन्सारपाखें सरकारयात जुइमाःगु राजश्व संकलन तकं ठप्प जूगु खः ।
उकिं सरकारं थुकियात कयाः छानबिन यायेगु निर्णय याःगु खः। थ्व विषय अर्थ अन्तर्गतया भन्सार व गृह अन्तर्गतया सीडीओ सम्बन्धी जूगु कारणं अर्थ व गृह निगुलिं मन्त्रालय जानाः छानबिन यायेत्यंगु खः ।
भन्सार कार्यालयया हडताल धाःसा थौं तकं जारी जुयाच्वंगु दु। थुकिं यानाः उगु नाकाय् वये-वने जुइमाःगु सामानत तकं लँय् तुं थानाच्वंगु दु ।
