अक्टोपसया भविष्यवाणी हानं पाय्छि
येँ (सन्ध्या टाइम्स)/म्हिगः जूगु विश्वकप सेमिफाइनल कासाय् स्पेन त्यायेवं थुगु विश्वकपय् थीथी खेलया भविष्यवाणी याना वयाच्वंम्ह 'पउल' नांयाम्ह अक्टोपस छक्वलं हे अन्तर्राष्ट्रिय 'सेलिब्रिटी' जूगु दु ।
विश्वकपया शुरुं निसें हे जर्मन टिम त्याइगु भविष्यवाणी याना वयाच्वंम्ह उम्ह अक्टोपसं म्हिगः जर्मनी व स्पेन दथुइ जुइगु कासाय् स्पेन त्याइगु भविष्यवाणी याःगु खः। धाः गथ अथे हे म्हिगः बहनी जूगु कासाय् स्पेनं जर्मनीयात १-० गोलं बुका बिल। थ्वयां लिपा अक्टोपस विश्वन्यंकं हे चर्चाया विषय जूगु खः। थुकिया बारे थौं सीएनएन, बीबीसी आदि थेंज्याःगु अन्तर्राष्ट्रिय समाचार च्यानलतय्सं नं अतिकं महत्व बियाः समाचार प्रशारण यानाच्वंगु दु ।
बेलायतय् जन्म जूम्ह थुम्ह अक्टोपस थौंकन्हय् जर्मनीइ दु। निदँ न्ह्यः युरोपियन कपया इलय् नं थ्वं थज्याःगु हे भविष्यवाणी याःगु गुगु ७० प्रतिशत तक मिले जुल। थुगुसी धाःसा शतप्रतिशत हे धइथें मिले जुयाच्वंगु दु। मनूतय्सं याःगु भविष्यवाणी मिले मजूसां थ्वयागु धाःसा अचुक जुयाच्वंगु दु ।
