बुटवल घटना छानबिनया निंतिं माओवादीपाखें समिति गठन
नेकपा एकीकृत माओवादीं केन्द्रीय सचिवालय दुजः वर्षमान पुन अनन्तया संमयोजकत्वय् बुटवल घटना छानबिन यायेत छगू समिति गठन याःगु दु ।
मंगलवाः च्वंगु माओवादीया बैठकं पुनया संयोजकत्वय् स्वम्ह दुजः दुथ्याःगु समिति गठन याःगु खः । समिति पुननापं अधिवक्ता एकराज भण्डारी व लिला मरासैनी नं दुथ्याः ।
सुथय् प्रधानमन्त्री निवास बालुवाटारय् च्वंगु बैठकं बुटवल घटनाया छानबिन याकनं स्वयां यानाः छानबिन प्रतिवेदन पार्टीयात लःल्हायेत निर्देश ब्यूगु दु । अथेहे बैठकं बुटवल घटनाय् ल्हाः दु धकाः नेकपा एमालें द्वपं बियाच्वम्ह वाइसिलया रुपन्देही इन्चार्ज सुजीत विकयात कानुनी दायरा दुने वयेत निर्देशन ब्यूगु दु ।
बैठकलिपा जानकारी ब्यूसें समितिया संयोजक पुनं द्वपंबियातम्ह विक पार्टी सम्पर्कय् मदुगु खँ कनादिल ।
वंगु मार्च २६ तारिक खुन्हु एमाले समर्थीत युथफोर्सया कार्यकर्ता प्रचण्ड थैवयात बुटवलय् गोलिं कायॆकाः स्याःगु खः । एमालें हत्याया अपराधीयात मज्वंतलय् संसद् सुचारु याकेमबीगु व मन्त्री परिषदया बैठक बहिष्कार यायेगु ख्याच्वः लिपाः माओवादीं एमाले नापया स्वापू सुधार यायेत थ्व पलाः ल्ह्वंगु खः ।
