सकली मवःगुलिं नकली साः
येँ (सन्ध्या टाइम्स)/वा पीगु मौसम थ्यंकाः नं देशय् साःया हाहाकार जुयाच्वंगु मौकाय् लाकाः सीमावर्ती लागाय् भारतपाखें ज्या लगे मजूगु साः सुचुका हयाः मीगु ज्या जुयाच्वंगु खँ सीदुगु दु। थ्व झ्वलय् नवलपरासीया आपालं थासय् अज्याःगु गुणस्तरहिन भारतीय साः दुहां वयाच्वंगु दु।
साः मदयाः किसानत हीमी चायाच्वंगु इलय् तस्करतय्सं भारतं कया हःगु अज्याःगु ज्या लगे मजूगु साः किसानतय् छेँय् छेँय् हे थ्यंका बीगु ज्या समेत यानाच्वंगु खँ नं सीदुगु दु ।
भारतं साइकलय् तयाः हइगु थज्याःगु साः नवलपरासीया बसहिया, पकलिहवाया रामनगर आदि लागाय् हयाः तया तइगु व अन ट्रकय् लोड यानाः बजाःपाखे हयाः मीगु खँ धाःगु दु। भारतं हइगु अज्याःगु साः थौंकन्हय् सीमावर्ती लागाय् च्वंगु बजाःया स्थानीय ब्यापारीतय्गु गोदामय् मुंकेगु ज्या जुयाच्वंगु खँ नं धाःगु दु। तर उमित स्थानीय प्रशासनं कारवाही धाःसा मयाःगु खँ नं सूत्रं धाःगु दु ।
थुगुसी जूगु थ्व साःया अभावं स्वनिगलय् भचा भचा जुइगु बाली तकं प्रभावित जूगु दु। खास यानाः ख्वपय् साः मदयाः किसानतय्त समस्या जूगु खँ धाःगु दु। ख्वपय् नं साःया अभाव जुयाच्वंगु थ्व मौकाया लबः कयाः ज्या मवःगु साः हयाः मीगु ज्या जूगु खः ।
नापं थुगुसी इलय् वा नं मवःगुलिं किसानत निखें मारय् लानाच्वंगु दु। वा मवयाः आपालं थासय् वा पीगु ज्या शुरु तकं मजूनि ।
