भक्तमानया अपहरण भीमसेन पण्डित पुचलं
भरतपुर स्थित विपि कोइराला मेमोरियल अस्पतालया कार्यकारी निर्देशक डा. भक्तमान श्रेष्ठया अपहरण भीमसेन पण्डित पुचलं याःगु निष्कर्ष प्रहरीं पिकागु दु । न्याम्ह स्वयां अप्व विशिष्ट मनूत अपहरणया द्वपं लानाच्वंगु थुगु पुचलं हे श्रेष्ठया नं अपहरण याःगु खँ प्रहरीं धाःगु दु ।
श्रेष्ठया अपहरणया बारे या:गु अनुसन्धान लिपा बिहीवाः प्रहरी प्रधान ज्याकूथी याःगु पत्रकार सम्मेलनय् अनुसन्धान पुचया प्रमुख वरिष्ठ प्रहरी उपरीक्षक देवेन्द्र सुवेदीं पण्डित पुचया ३७दँ दुम्ह भीमसेन पण्डित व भारत छेँ जुम्ह ३०दँया रोहित पलिवल अपहरणया मुख्य योजनाकार जूगु जानकारी बियादिल ।
उगु अपहरणया मुख्य योजनकारतय्त आः तक ज्वनेमफुसां मेपिं स्वम्ह नविन क्षेत्री, सुनिल श्रेष्ठ व बद्रि ढुंगानायात प्रहरीं ज्वंगु दु । बद्रि भरतपुर अस्पतालया हे पुलांम्ह कर्मचारी खः । अपहरणय् न्याम्ह नेपाली नागरिक व निम्ह भारतीय नागरिकया संग्लनता दुगु व ज्वने ल्यं दुपिं दक्वं भारतय् सुलाच्वंगु खँ प्रहरीं धाःगु दु ।
अस्पतालया पुलांम्ह कर्मचारी बद्रिया सुराकीया आधारय् पण्डित व पलिवलं जेठ ४ गते बहनी अस्पताल पाखें छेँ लिहांवनाच्वंगु इलय् श्रेष्ठयात अपहरण याःगु खः । अपहरण लिपा वहे बहनी चितवन पाखें मुग्लिङ जुयाः चारघरेस्थित पण्डितया छेँय् श्रेष्ठयात तःगु खँ प्रहरीं जानकारी ब्यूगु दु ।
वया कन्हय् खुन्हु येँय् हयाः पण्डितया फ्ल्याटय् तःगु खँ प्रहरी अनुसन्धानं क्यंगु दु । लिपा श्रेष्ठया छेँजः नं स्वंगू किलो लुँ भारतय् वना फिरौति लःल्हाःगु खःसा उगु फिरौति धुंका येँय् तयातम्ह श्रेष्ठयात जेठ २२ गते मोटरसाइकलय् तया पण्डित सहित निम्हेसिनं धादिङया मझिमटारय् मुक्त याःगु खः ।
