विराटनगरया दक्वं सरकारी ज्याकू बन्द
मोरङया प्रमुख जिल्ला अधिकारीयात कारवाही यायेमाःगु माग यासें आन्दोलनरत सरकारी कर्मचारीतय्सं बिहीवाः मोरङया दक्वं सरकारी ज्याकूत बन्द याःगु दु । आन्दोलनरत कर्मचारीतय्सं बिहीवाः न्हिनय् सरकारी ज्याकू पिने च्वनाः धर्ना नं ब्यूगु दु ।
कर्मचारीतय्सं मोरङया प्रजिअ शशीशेखर श्रेष्ठं जोगवनीया भन्सार अधिकृत मनबहादुर पौडेलयात बुधवाः बहनी ज्वना: थःगु हे छेँय् यंकाः दुर्व्यवहार याःगु द्वपं ब्यूगु दु । उमिसं प्रजिअयात कारवाही मयायेकं ज्याय् लिहांमवनीगु व सरकारी ज्याकू नं मचायेकेगु अडान काःगु दु ।
भन्सार ज्याकूथीं राजश्व छले याःगु धासें प्रजिअ श्रेष्ठया आदेशय् असार ११ गते विराटनगरय् च्वंगु विशाल कम्प्लेक्सय् प्रहरीं छापा मारे याःगु खः । लिपा असार १७ गते उगु छापे मारे यानाः अन्याय जूगु धासें उद्योगया संचालक भवानीशंकर बोहरां पुनरावेदन अदालतय् मुद्दा दर्ता याःगु खः ।
अदालतं प्रशासनया नांमय् अन्तरिम आदेश जारी यायेवं आक्रोशित प्रजिअं बुधवाः बहनी भन्सार प्रमुख सहित प्यम्हेसित नियन्त्रणय् काःगु खः ।
