भक्तमानयात अपहरण याःपिं निम्हेसित ज्वन

विपि कोइराला मेमोरियल क्यान्सर अस्पताल चितवनया कार्यकारी निर्देशक डा. भक्तमान श्रेष्ठया अपहरणय् संलग्न निम्हेसित प्रहरीं ज्वंगु दु ।

प्रहरी प्रधान ज्याकूथीया अपराध महाशाखाया एसएसपी देवेन्द्र सुवेदीया नेतृत्वय् गठन जूगु अनुसन्धान पुचलं तयार याःगु प्रतिवेदनया आधारय् छम्ह नेपाली व छम्ह भारतीय नागरिकयात प्रहरीं ज्वंगु दु । प्रहरीं उगु अपहरणय् गुम्हेसिया संलग्नता दुगु व थुकीया बारे पूर्ण विवरण थौं सनिलय् छगू पत्रकार सम्मेलन यानाः सार्वजनिक यायेगु खँ धाःगु दु ।

जेठ ४ गते बहनी अस्पतालं छेँय् लिहांवयाच्वंगु इलय् अपहरणय् लानादीम्ह श्रेष्ठयात झिंगुन्हु लिपा मुक्त याःगु खः । प्रहरीं श्रेष्ठयात अपहरण मुक्त यायेत वय्कया छेँजः नं १ करोड १० लख बरारया लुँ अपहरणकारीतय्त फिरौटी ब्यूगु खँ धाःगु दु ।